ການປິ່ນປົວມະເຮັງຕັບແມ່ນຂຶ້ນກັບຄວາມຮຸນແຮງຂອງພະຍາດ, ຂະໜາດ ແລະ ລັກສະນະຂອງເຊລມະເຮັງ, ໄລຍະຂອງພະຍາດ ແລະ ການແຜ່ກະຈາຍຂອງມະເຮັງ ລວມທັງສຸຂະພາບໂດຍລວມຂອງຄົນເຈັບ ທ່ານໝໍຈະພິຈາລະນາການປິ່ນປົວທີ່ດີທີ່ສຸດ ແລະ ເໝາະສົມທີ່ສຸດສຳລັບຄົນເຈັບແຕ່ລະຄົນ.
– ການຜ່າຕັດ.
– ການປິ່ນປົວດ້ວຍລັງສີ.
– ການປິ່ນປົວດ້ວຍເຄມີບຳບັດ.
– ການຜ່າຕັດປ່ຽນຕັບ ສາມາດເຮັດໄດ້ ຖ້າກ້ອນໃນຕັບມີຂະໜາດ ນ້ອຍກວ່າ 5 ຊມ ແລະ ຄົນເຈັບມີອາຍຸຕໍ່າກວ່າ 70 ປີ.
ການປິ່ນປົວທີ່ດີທີ່ສຸດສໍາລັບມະເຮັງຕັບແມ່ນການປ້ອງກັນ ແລະ ກວດຫາມະເຮັງຕັບ, ເພາະວ່າ 90% ຂອງມະເຮັງຕັບແມ່ນເກີດມາຈາກການຕິດເຊື້ອຕັບອັກເສບ B ແລະ C. ດັ່ງນັ້ນຄົນເຈັບທີ່ເປັນພະຍາດຕັບອັກເສບ B ແລະ C ຈຶ່ງມີໂອກາດເປັນພະຍາດຕັບແຂງ ແລະ ມະເຮັງຕັບຫຼາຍຂຶ້ນ. ຖ້າເກີດເປັນມະເຮັງຕັບ ມັນຈະຂະຫຍາຍໂຕເພີ່ມຂຶ້ນເປັນສອງເທົ່າພາຍໃນ 3-6 ເດືອນ, ສະນັ້ນຄົນເຈັບທີ່ເປັນພະຍາດຕັບອັກເສບ B ແລະ C ຄວນໄດ້ຮັບການກວດການເຮັດວຽກຂອງຕັບ ແລະ ກວດຫາມະເຮັງຕັບໂດຍການກວດເລືອດເພື່ອບົ່ງຊີ້ພະຍາດມະເຮັງຕັບ (alpha-fetoprotein) ແລະ ກວດ ultrasound ຕັບທຸກໆ 3 ເດືອນ.